Fxqoazh

Mapa de Saraqusta
1.Mezquita Blanca (Alchama) / 2.La Zuda / 3.Puerta d'Alcantara / 4.Puerta de Toledo / 5.Puerta Cinecha / 6.Puerta de la Alquibla (u de Valencia) / 7.Puerta de Sancho / 8.Puerta d'o Portiello / 9.Puerta de Baltax / 10.Puerta de las Santas Masas / 11.Puerta de Tenerías / 12.Alchafaría (Alcazaba)

   Medina Saraqusta

   Chudería

   Bicos mozarabes

   Rabals

   Zoco

   Almusara

Saraqusta (en arabe سرقسطة, en hebreu סרקסטא) tamién dita la Medina Albaida (ciudat blanca, por a color d'os suyos edificios) yera o nombre de l'actual Zaragoza mientres o dominio musulmán en a zona.

A ciudat visigoda de Cesaracosta fue conquiesta por Táriq ibn Ziyad y Musa ibn Nusair en l'anyo 714, estando dende allora baixo lo control d'o Califato de Cordoba. mas tardi, entre 1018 y 1110 sería la capital d'a Taifa de Saraqusta, un d'os mas importants reinos musulmans independients d'a Peninsula Iberica.

Medina de Saraqusta[editar | editar código]

A parti principal de Saraqusta como en totas as ciudatz musulmanas d'a Edat Meya yera la medina (de l'arabe madīnah a traviés de l'arabe hispanico madína, ciudat), a on se trobaban os edificios d'o gubierno y l'administración d'a ciudat. En Saraqusta la medina yera adintro d'as mesmas murallas d'a ciudat romana de Caesaraugusta. Antimás s'aproveitó a estructura d'as carreras romanas, por ixo istas yeran quadriculatas y no chicotas y anarquicas como gosan estar en atras poblacions d'orichen musulmán.

Adintro d'a medina yeran as mezquitas d'a ciudat y entre istas amás important de totas, a dita Mezquita Blanca, l'alchama u principal mezquita d'a población, situata en o mesmo puesto a on hue ye a Seu d'o Salvador que encara conserva parti de l'alminar de l'antiga mezquita en a suya torre. Arredol d'ista yera o principal zoco d'a ciudat.

L'atro edificio important d'a medina yera La Zuda, palacio d'o gubernador d'a ciudat d'o que hue no se conserva que un torretón.

Chodigos y mozarabes[editar | editar código]

Os chodigos y mozarabes como en totas as ciudatz medievals d'a peninsula teneban os suyos propios vicos. Os dos por estar chents d'o libro (chodigos y cristians) teneban os suyos vicos situatos en a medina, adintro d'a muralla principal. A chudería yera situata arredol de l'actual zona de Sant Miguel. Por atra parti os vicos mozarabes yeran dividitos entre as actuals zonas d'as basilicas d'o Pilar, lo mas gran, y as Santas Masas, ista zaguera difuera d'a ciudat.

Rabals y almusara[editar | editar código]

A frontera d'o palacio de l'Alchafaría, en o rabal de Saraqusta.

Os rabals[editar | editar código]

Parte important d'as ciudatz medievals yeran os rabals (de l'arabe rabaḍ), os vicos situatos en os arredols d'a ciudat, difuera d'a muralla. En Saraqusta yeran situatos a l'atro canto de l'Ebro, a on hue encara ye o vico d'o Rabal y arredol de l'actual Paseyo d'a Independencia.

Iste zaguer rabal, yera situato chunto a la muralla en a zona d'a puerta Cinecha. Seguntes creyen bells autors en iste vico viviban os Berbers, por ixo lo nombre de Cinecha en referencia a una confederación berber (Confederación Zenacha), pero podría provenir tamién de l'antroponimo latín CINEGIA. O vico yera situato aintro d'a resta d'a ciudat que yera protechita por una segunda muralla muito mas enreble que la romana. Tamién bi heba un zoco en ista zona d'a ciudat.

Almusara y Alcazaba[editar | editar código]

A torre d'o Trobador, o nuclio orichinario d'o palacio de l'Alchafaría en o rabal de Saraqusta.

Tamién en a parte externa d'a ciudat, en o mesmo puesto de l'actual vico de l'Almozara yera situata l'almusara. En l'almusara gosaba reunir-se a poblacion d'a ciudat ta fer celebracions de tot tipo, como autos melitars u oracions.

Amán de l'almusara yera l'alcazaba (de l'arabe clasico qaṣabah, a traviés de l'arabe hispanico alqaṣába), construita por Al-Muqtadir en o sieglo XI a partir de l'atalaya que existiba dende o sieglo IX (torre d'o Trobador), o palacio de l'Alchafaría yera un edificio d'esfensa d'a ciudat, dende a on s'acucutaba la plegata de posibles enemigos.

Fortificacions[editar | editar código]

A parti principal d'a ciudat, a medina conservaba las antigas murallas romanas de Caesaraugusta.^[1] As puertas principals d'iste aniello interior yeran a puerta d'Alcantara (de l'arabe hispanico alqánṭara y iste de l'arabe clasico qanṭarah, centro de cerclo) u tamién dita puerta d'o Puent, ya que saliba a lo puent d'o río Ebro, a puerta de l'Alquibla (de l'arabe hispanico alqíbla y iste de l'arabe clasico qiblah) u de Valencia que yera la que sinyalaba la endreza ta la Meca a l'este d'a ciudat, a puerta de Toledo a l'ueste y a "Puerta Cinecha" (bells autors creyen que probién d'a confederación Zenacha) a lo sur en o mesmo puesto a on hue ye a plaza d'Espanya.

O segundo aniello de muralla u radam fue construito ya por os musulmans y encletaba la resta d'a ciudat de Saraqusta. As principals puertas yeran a puerta de Sancho (en l'actual Plaza d'Europa), a Puerta del Portiello, a puerta de Baltax (en o puesto de l'actual puerta d'o Carmen) a puerta d'as Santas Masas y a puerta d'as Tenerías

Referencias[editar | editar código]

Bibliografía[editar | editar código]

• (es) María Jesús Viguera Molins: Aragón musulmán. La presencia del Islam en el valle del Ebro. Mira Editores, 1998.